کیا حائضہ مسجد کے صحن میں بیٹھ سکتی ہے؟

استفتاء

ایک مسئلہ پوچھنا ہے کہ حرمین شریفین اور دیگر مساجد کے صحن میں حائضہ عورت بیٹھ سکتی ہے یا نہیں؟

الجواب :بسم اللہ حامداًومصلیاً

مسجد  میں حائضہ کا داخلہ ممنوع ہے، چاہے مسجد کا ہال ہو یا اس کا صحن ،حائضہ عورت کے لیے  کسی جگہ بیٹھنا بھی جائز نہیں۔حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا:وَجِّهُوْا هٰذِهِ الْبُيُوتَ عَنِ الْمَسْجِدِ فَإِنِّى لَا أُحِلُّ الْمَسْجِدَ لِحَائِضٍ وَلَا جُنُبٍ.(سنن ابی داؤد: رقم الحدیث 232)ترجمہ: اپنے گھروں (کے دروازوں) کا رخ مسجد سے پھیر دو! کیونکہ میں مسجد(میں داخل ہونے ) کو کسی حائضہ یا جنبی شخص کے لیے حلال قرار نہیں دیتا۔ابتداء میں بعض صحابہ کرام رضی اللہ عنہم کے گھروں کا دروازہ مسجد میں کھلتا تھا۔ ظاہر ہے کہ اگر کوئی جنبی  ہوتا یا کوئی عورت حیض کی حالت میں ہوتی  اور اسے گھر سے باہر جانے کی حاجت ہوتی تو اسے مسجد کے صحن سے ہی گزرنا پڑتا۔ بعد میں آپ صلی اللہ علیہ وسلم نے گھروں کے دروازوں کا رخ مسجد سے پھیرنے کا حکم دیا کیونکہ اب حائضہ  اور جنبی کا داخلہ مسجد میں ممنوع قرار دیا جا چکا تھا۔واللہ اعلم بالصوابدارالافتاء مرکز اہل السنۃ والجماعۃ سرگودھا