”الفقہ الاکبر“ کے ابتدائیہ میں ”قال الامام الاعظم“ کا قائل کون ہے؟

استفتاء

”الفقہ الاکبر“ کى عبارت ”قال الامام الأعظم ابو حنیفۃ النعمان رضی اللہ عنہ“ کس کى ہے؟ اگر امام صاحب رحمۃ اللہ علیہ کى ہے تو امام صاحب رحمۃ اللہ علیہ کا اپنے بارے میں ”قال الامام الأعظم“ اور ” رضی اللہ عنہ“تحرىر فرمانا کیونکر درست ہو سکتا ہے؟ اس کے بارے مىں ذرا تفصىل سے ارشاد فرما دىں!

الجواب :بسم اللہ حامداًومصلیاً

”الفقہ الاکبر“ کا جو نسخہ ہمارے زیرِ درس ہے یہ امام اعظم رحمۃ اللہ علیہ کے بیٹے امام حماد بن ابی حنیفہ رحمہما اللہ کی روایت سے مروی ہے۔ علمائے سابقین میں تصنیف و تالیف کا عمومی طرز یہ رہا ہے کہ صاحبِ کتاب اپنی کتاب تلامذہ کو املاء کرا دیتے تھے۔ طلبہ اس املاء شدہ مسودہ کو جب آگے اپنے تلامذہ کو نقل کراتے تو اپنے استاد کی طرف اس کتاب کے انتساب میں استاذ کا نام لیتے۔ ظاہر ہے استاذ کا نام ان کے مقام و مرتبہ اور عظمت کو ملحوظ رکھ کر ہی لیا جاتا ہے۔ اس لیے شاگرد اس کا اہتمام کرتے کہ استاذ کے لقب اور دعائیہ کلمات کو ذکر کرتے۔امام اعظم رحمۃ اللہ علیہ سے روایت کرتے ہوئے راوی کتاب نے بھی یہ کلمات تحریر کروائے جو شاگرد در شاگرد نقل ہوتے ہوئے ہم تک روایت ہوتے چلے آئے ہیں۔یہ طرزِ انتساب کئی کتب میں ملتا ہے۔ چند کتب کا ابتدائیہ ملاحظہ ہو۔1: کنز الدقائق (علامہ ابو البرکات عبد اللہ بن احمد النسفی الحنفی ت710ھ) کا ابتدائیہ یوں ہے:قَالَ مَوْلَانَا الْحَبْرُ النِّحْرِيرُ صَاحِبُ الْبَيَانِ وَالْبَنَانِ فِي التَّقْرِيرِ وَالتَّحْرِيرِ كَاشِفُ الْمُشْكِلَاتِ وَالْمُعْضِلَاتِ مُبَيِّنُ الْكِنَايَاتِ وَالْإِرْشَادَاتِ مَنْبَعُ الْعُلَى عِلْمُ الْهُدَى أَفْضَلُ الْوَرَى حَافِظُ الْحَقِّ وَالْمِلَّةِ وَالدِّينِ شَمْسُ الْإِسْلَامِ وَالْمُسْلِمِينَ وَارِثٌ لِعُلُومِ الْأَنْبِيَاءِ وَالْمُرْسَلِينَ أَبُو الْبَرَكَاتِ عَبْدُ اللَّهِ بْنُ أَحْمَدَ بْنِ مُحَمَّدٍ النَّسَفِيُّ.2: کتاب جامع العلوم والحكم (امام زین الدین عبد الرحمٰن بن احمد بن رجب الحنبلی ت795ھ) کا ابتدائیہ یہ ہے:قال الشیخ الٳمام العالم الأوحد شرف الٳسلام مفتی الأنام بقیۃ السلف الکرام الشیخ زین الدین عبد الرحمٰن بن الشیخ العلامۃ شھاب الدین أحمد ابن الشیخ الٳمام رجب البغدادی فسح اللہ فی مدتہ ونفع بہ وأمتع المسلمین بطول بقائہ بمنہ وکرمہ.3: کتاب ”الاتقان فی علوم القرآن“ (علامہ جلال الدین عبد الرحمٰن بن ابی بکر السیوطی الشافعی(ت911 ھ) کا ابتدائیہ یوں ہے:قال الشيخ الإمام العالم العلامة الحبر البحر الفهامة، المحقق المدقق الحجۃ الحافظ المجتہد شیخ الاسلام والمسلمین وارث علوم سید المرسلین جلال الدين اوحد المجتہدین ابو الفضل عبد الرحمٰن ابن سیدنا الشیخ المرحوم کمال الدین عالم المسلمین ابو المناقب السيوطيّ الشافعيّ.اس لیے تصانیف کے اس طرز کو دیکھتے ہوئے یہ اشکال رفع ہو جانا چاہیے کہ صاحبِ کتاب خود اپنی کتاب میں اپنا لقب اور دعائیہ کلمات کس طرح لکھ سکتے ہیں!!
واللہ اعلم بالصواب
دارالافتاء
مرکز اہل السنۃ والجماعۃ سرگودھا