خاوند بیوی ساتھ لیٹے ہوئے ڈسچارج ہو جائیں تو روزے کا حکم

استفتاء

میرا سوال یہ ہے کہ سحری کے بعد روزے کی حالت میں بیوی کے ساتھ سوتے ہوئے اگر آدمی یا عورت ڈسچارج ہو جائے تو کیا روزہ ٹوٹ جائے گا یا نہیں؟ اگر ٹوٹ جائے گا تو اس کا کفارہ کیسے ادا کریں گے ؟

الجواب :بسم اللہ حامداًومصلیاً

1:      اگر خاوند یا بیوی نیند کی حالت میں ڈسچارج ہوئے ہوں اگرچہ اکٹھے لیٹے ہوئے ہوں تو اس سے روزہ نہیں ٹوٹتا اور نہ ہی کوئی کفارہ لازم ہوتا ہے۔

2:      اگر دونوں جاگ رہے ہوں اور حرکت کرنے، بوس وکنار کرنے یا چھیڑ چھاڑ کرنے سے ڈسچارج ہو جائیں (بشرطیکہ جماع تک نوبت نہ پہنچی ہو) تو روزہ ٹوٹ جاتا ہے لیکن کفارہ لازم نہیں ہوتا۔  اس لیے اگر  خاوند یا بیوی میں سے جس کو بھی ایسی صورتحال پیش آ جائے تو وہ رمضان المبارک کے بعد ایک روزے کی قضاء کر لے۔